Slitgigtarhópur

Slitgigt er einn algengasti liðsjúkdómurinn og einkennist af niðurbroti brjósks í liðum sem leiðir til verkja, stirðleika og skertrar hreyfigetu. Sjúkdómurinn hefur áhrif á lífsgæði og getur dregið verulega úr þeim. Hjá Eflingu sjúkraþjálfun bjóðum við upp á sérhæfða þjálfun og meðferð sem miðar að því að draga úr einkennum slitgigtar, bæta hreyfigetu og styrkja þá vöðva sem styðja við liðina.

Hvað felst í slitgigtarþjálfun?

Markviss þjálfun er ein áhrifaríkasta leiðin til að meðhöndla slitgigt og hafa vísindalegar rannsóknir ítrekað sýnt fram á jákvæð áhrif hennar á bæði verki og hreyfigetu. Meðferðin er einstaklingsmiðuð og tekur mið af líðan, getu og markmiðum hvers skjólstæðings.

Þjálfunin byggir á:

• Styrktarþjálfun — uppbygging vöðvastyrks í kringum liðina til að létta álag og auka stöðugleika
• Liðleikaþjálfun — bæta eða viðhalda hreyfigetu liða
• Jafnvægis- og samhæfingarþjálfun — til að minnka áhættu á byltu og bæta hreyfistjórn
• Fræðsla og leiðbeiningar — um sjálfsþjálfun, hreyfimynstur og líkamsbeitingu í daglegu lífi

Um hópinn

Þjálfunin fer fram undir leiðsögn sjúkraþjálfara með góða þekkingu á slitgigt og endurhæfingu fólks með slitgigt. Áhersla er á öruggar og árangursríkar æfingar sem eru aðlagaðar að getu og þörfum hvers og eins. Hóptímarnir eru byggðir upp með velferð, öryggi og gleði í huga auk þess sem þeir skapa jákvæða félagslega samveru í hvetjandi umhverfi.

• Tímar: Þriðjudagar og föstudagar kl. 12:05
• Staður: Krónan, Hafnarstræti 97, 4. hæð
• Leiðbeinendur: Audrey Freyja Clarke, Elín Rós Jónasdóttir, Hannes Bjarni Hannesson, Helgi Steinar Andrésson
• Verð: Það þarf beiðni í sjúkraþjálfun í hóptímana. Verð skv. gjaldskrá SÍ
• Skráning og upplýsingar: Senda tölvupóst á efling@eflingehf.is eða hringja í s. 461-2223.

Fyrir hvern er þjálfunin?

Slitgigtarhópurinn hentar einstaklingum með slitgigt í hné eða mjöðm eða hafa farið í liðskipti á hné eða mjöðm. Hann hentar einstaklingum á öllum stigum sjúkdómsins — hvort sem einkenni eru væg eða umtalsverð. Ef gripið er snemma inn í framgang sjúkdómsins þá getur það hægt verulega á framgangi hans og dregið úr þörf fyrir lyfjameðferð eða skurðaðgerð.